യാത്രകളില്‍ പലപ്പോഴും വഴികാട്ടിയായി സഹായിക്കുന്ന ആപ്പാണ് ഗൂഗിള്‍ മാപ്പ്. പക്ഷം ചിലപ്പോളെങ്കിലും ഗൂഗിള്‍ മാപ്പിനും വഴിതെറ്റും. അങ്ങനെ വഴിതെറ്റി കുളത്തിലും പുഴയിലുമൊക്കെ വാഹനങ്ങള്‍ വീഴുന്ന അപകടസംഭവങ്ങളും ധാറാളം റിപ്പോര്‍ട്ട് ചെയ്യപ്പെട്ടിട്ടുണ്ട്. കാര്യങ്ങള്‍ അങ്ങനെ പോകുമ്പോളാണ് ഗൂഗിള്‍ മാപ്പിന് എതിരാളിയായി ഇന്ത്യന്‍ നിര്‍മിത ആപ്പ്, 'മാപ്പ്ള്‍സ്' എത്തുന്നത്. പ്രത്യേകതകളിലും സൂക്ഷ്മതയിലും ഗൂഗിള്‍ മാപ്പിനെ വെല്ലുന്ന
ഈ ഇന്ത്യന്‍ നിര്‍മിത ആപ്പിന് പിന്തുണയുമായി കേന്ദ്ര സര്‍ക്കാരും എത്തിയതോടെ മാപ്പ്ള്‍സിന്റെ മുന്നോട്ടുള്ള വഴി സുഗമമായിരിക്കുകയാണ്.
മാപ് മൈ ഇന്ത്യ കമ്പനി പൂര്‍ണമായും ഇന്ത്യയില്‍ നിര്‍മിച്ച 'മാപ്പ്ള്‍സ്' ആപ്പ് ഉപയോഗിച്ച് കേന്ദ്ര റെയില്‍വേ മന്ത്രി അശ്വിനി വൈഷ്ണവ് എക്‌സില്‍ വീഡിയോ പങ്കിട്ടിരുന്നു. ആപ്പിലേത് മികച്ച ഫീച്ചറുകളാണെന്നും എല്ലാവരും ഉപയോഗിച്ചു നോക്കണമെന്നും കുറിച്ചുകൊണ്ടാണ് അശ്വിനി വൈഷ്ണവ് വീഡിയോ പങ്കുവെച്ചത്.
3ഡി ജംഗ്ഷന്‍ വ്യൂസ്, റിയല്‍ ടൈം െ്രെഡവിങ്ങ് അലേര്‍ട്ടുകള്‍, ഡോര്‍ സ്‌റ്റെപ് നേവിഗേഷന്‍ തുടങ്ങിയ നിരവധി വ്യത്യസ്ത ടൂളുകളാണ് സ്മാര്‍ട്ട് നേവിഗേഷന്‍ ആപ്പായ 'മാപ്പ്ള്‍സി'ലുള്ളത്. ഉപയോക്താക്കള്‍ക്ക് യാത്രാ ചെലവുകള്‍ മുന്‍കൂട്ടി കണക്കാക്കാനും, അപകട സാധ്യതയുള്ള മേഖലകളെയും സ്പീഡ് ബ്രേക്കറുകളെയും കുറിച്ചുള്ള അലേര്‍ട്ടുകള്‍ ലഭിക്കാനും, ട്രാഫിക് സിഗ്‌നലുകളെക്കുറിച്ചും സിസിടിവി ക്യാമറ പോയിന്റുകളെക്കുറിച്ചും തത്സമയ അപ്‌ഡേറ്റുകള്‍ ആക്‌സസ് ചെയ്യാനും ആപ്പില്‍ സാധിക്കും.
റെയില്‍വേ സംവിധാനങ്ങളില്‍ ആപ്പിന്റെ സാങ്കേതികവിദ്യ ഉപയോഗിക്കുന്നതിനായി ഇന്ത്യന്‍ റെയില്‍വേയും 'മാപ്പ്ള്‍സും' തമ്മില്‍ ഒരു കരാര്‍ ഉടന്‍ ഒപ്പുവെക്കുമെന്ന് അശ്വിനി വൈഷ്ണവ് പ്രഖ്യാപിച്ചു. ഡിജിറ്റല്‍ ഇന്‍ഫ്രാസ്ട്രക്ചര്‍, ആര്‍ട്ടിഫിഷ്യല്‍ ഇന്റലിജന്‍സ് തുടങ്ങിയ പ്രധാന മേഖലകളില്‍ തദ്ദേശീയമായ നവീകരണത്തെ പ്രോത്സാഹിപ്പിക്കുന്നതിലൂടെ, ഇന്ത്യ സ്വദേശി ടെക് ആവാസവ്യവസ്ഥയെ ശക്തിപ്പെടുത്തുന്ന സമയത്താണ് ഈ പ്രഖ്യാപനം.
നേരത്തെ ഇന്ത്യന്‍ നിര്‍മിത ആപ്പുകളായ അറട്ടൈ, സോഹോ മെയില്‍ തുടങ്ങിയവയെ കേന്ദ്രം പ്രോത്സാഹിപ്പിച്ചിരുന്നു. അതിന് പിന്നാലെയാണ് 'മാപ്പ്ള്‍സി'നും പിന്തുണ നല്‍കുന്നത്. ജിമെയിലിനും മൈക്രോസോഫ്റ്റ് ഔട്ട്‌ലുക്കിനും പകരമായി ഉപയോഗിക്കാവുന്ന ഇന്ത്യന്‍ മെയില്‍ പ്ലാറ്റ്‌ഫോമാണ് സോഹോ മെയില്‍. വാട്‌സ്ആപ്പിന് ബദലായി പുറത്തിറക്കിയ ഇന്ത്യന്‍ നിര്‍മിത മെസേജിങ് ആപ്പ് ആണ് അറട്ടൈ.
ഗൂഗിള്‍ മാപ്പിന് ഒരു ഇന്ത്യന്‍ ബദല്‍; സ്വദേശി സാങ്കേതിക മുന്നേറ്റത്തിന് 'ഇന്ധനം നല്‍കി 'മാപ്പ്ള്‍സ്'
