ന്യൂഡൽഹി: സി.ബി.എസ്.ഇ സ്കൂളുകളിൽ 9-ാം ക്ലാസ് മുതലുള്ള വിദ്യാർഥികൾക്ക് ജൂലൈ 1 മുതൽ മൂന്ന് ഭാഷകളുടെ പഠനം നിർബന്ധമാക്കി. തെരഞ്ഞെടുക്കുന്ന മൂന്ന് ഭാഷകളിൽ രണ്ടെണ്ണം ഇന്ത്യൻ ഭാഷകളായിരിക്കണം. ദേശീയ വിദ്യാഭ്യാസ നയത്തിന്റെ ഭാഗമായുള്ള ദേശീയ കരിക്കുലം ഫ്രെയിംവർക്കിന്റെ ഭാഗമായാണ് നടപടി. എന്നാൽ, പത്താം ക്ലാസിൽ വിദ്യാർഥികൾ തെരഞ്ഞെടുക്കുന്ന മൂന്നാമത്തെ ഭാഷയ്ക്ക് ബോർഡ് പരീക്ഷയുണ്ടാവില്ലെന്നാണ് അറിയുന്നത്. സ്കൂൾ തലത്തിലാകും ഈ ഭാഷയുടെ മൂല്യനിർണയം.
സി.ബി.എസ്.ഇയുടെ പട്ടികയിലുള്ള ഏത് ഭാഷയും സ്കൂളുകൾക്ക് തെരഞ്ഞെടുക്കാം. രണ്ട് ഇന്ത്യൻ ഭാഷകൾ തെരഞ്ഞെടുത്തെങ്കിൽ മാത്രമേ വിദേശ ഭാഷ മൂന്നാമത്തേതായി പഠിക്കാനാകൂ. അതായത് ഇംഗ്ലീഷ് ഒരു ഭാഷയായി തെരഞ്ഞെടുത്തിട്ടുണ്ടെങ്കിൽ മറ്റ് രണ്ട് ഭാഷകളും ഇന്ത്യൻ ഭാഷ തന്നെയാവണം. ഒന്നാം ഭാഷയായി ഇംഗ്ലീഷും രണ്ടാം ഭാഷയായി മലയാളവും തെരഞ്ഞെടുത്താൽ, മൂന്നാമത്തെ ഭാഷ ഹിന്ദിയോ ഉറുദുവോ തമിഴോ അല്ലെങ്കിൽ മറ്റേതെങ്കിലും ഇന്ത്യൻ ഭാഷകളോ മാത്രമേ തെരഞ്ഞെടുക്കാനാകൂ. അതേസമയം, ഫ്രഞ്ച്, ജർമ്മൻ തുടങ്ങിയ വിദേശ ഭാഷകൾ നാലാമത്തെ ഓപ്ഷണൽ ഭാഷയായി പഠിക്കാൻ അനുവദിച്ചിട്ടുണ്ട്.
സി.ബി.എസ്.ഇ സ്കൂളുകളിൽ മൂന്ന് ഭാഷ പഠനം നിർബന്ധം; രണ്ടെണ്ണം ഇന്ത്യൻ ഭാഷ
