ടെക്‌സാസ്: ടെസ്ലയുടെ സെല്‍ഫ് ഡ്രൈവിംഗ് റോബോടാക്സി സേവനം നടത്തുന്ന ലോകത്തിലെ ആദ്യത്തെ നഗരം ടെക്സാസിലെ ഓസ്റ്റിനാകും. എലോണ്‍ മസ്‌കിന്റെ ഉടമസ്ഥതയിലുള്ള ഇലട്രിക്‌സ് കാര്‍ നിര്‍മാതാക്കളായ ടെസ്ല ഏതാനും കാറുകളാണ് താത്ക്കാലികമായി ഓസ്റ്റിനില്‍ ഇറക്കുക.
കഴിഞ്ഞ വര്‍ഷം ഒക്ടോബറില്‍ പുറത്തിറക്കിയതിന് ശേഷം കമ്പനിയുടെ റോബോടാക്സി സേവനത്തെക്കുറിച്ചുള്ള വിശദാംശങ്ങള്‍ പുറത്തുവന്നിട്ടില്ല. ഓസ്റ്റിനില്‍ ഒരു ഡസനില്‍ താഴെ കാറുകള്‍ മാത്രമായിരിക്കുമെന്നും വാഹനങ്ങള്‍ പ്രത്യേക സ്ഥലങ്ങളില്‍ മാത്രമായി ഒതുങ്ങുമെന്നും മസ്‌ക് മാധ്യമ പ്രവര്‍ത്തകരോട് പറഞ്ഞു. തുടക്കത്തില്‍ ജീവനക്കാര്‍ക്കും ക്ഷണിക്കപ്പെട്ടവര്‍ക്കും മാത്രമേ റോബോടാക്സി ലഭ്യമാകൂ എന്നാണ് പ്രതീക്ഷിക്കുന്നത്.
ആദ്യ ദിവസം തന്നെ ആയിരമോ പതിനായിരമോ റോബോടാക്സികളുമായി തങ്ങള്‍ക്ക് ആരംഭിക്കാനാവുമെങ്കിലും അത് വിവേകപൂര്‍ണ്ണമായിരിക്കുമെന്ന് താന്‍ കരുതുന്നില്ലെന്നാണ് മെയ് മാസത്തില്‍ എലോണ്‍ മസ്‌ക് സി എന്‍ ബി സിയോട് പറഞ്ഞത്. ആദ്യം പത്ത് കാറുകളില്‍ നിന്നും തുടങ്ങാമെന്നും പിന്നീടത് 20, 30, 40 ആയി വര്‍ധിപ്പിക്കുമെന്നും മസ്‌ക് പറഞ്ഞു.
ഡ്രൈവര്‍ ഇല്ലാ കാറുകള്‍ റിമോട്ടായി നിരീക്ഷിക്കുമെന്ന് മസ്‌ക് പറഞ്ഞിട്ടുണ്ട്. എങ്കിലും സുരക്ഷയ്ക്കായി ഒരു ഡ്രൈവര്‍ വാഹനത്തിനോടൊപ്പം ഉണ്ടാകുമോ എന്ന കാര്യത്തില്‍ വ്യക്തതയില്ല.
ഏതാനും മാസങ്ങള്‍ക്കുള്ളില്‍ ഓസ്റ്റിന്‍ റോഡുകളില്‍ ആയിരം ടെസ്ല റോബോടാക്സികളാണ് മസ്‌ക് ഉദ്ദേശിക്കുന്നത്. തുടര്‍ന്ന് ടെക്സാസിലെയും കാലിഫോര്‍ണിയയിലെയും മറ്റ് നഗരങ്ങളിലേക്കും വ്യാപിപ്പിക്കുമെന്നും മസ്‌ക് പറഞ്ഞു.
റോബോടാക്സി പ്രവര്‍ത്തനത്തെ കുറിച്ച് ഫെഡറല്‍ അധികാരികള്‍ക്കും ശ്രദ്ധയുണ്ട്. നാഷണല്‍ ഹൈവേ ട്രാഫിക് സേഫ്റ്റി അഡ്മിനിസ്‌ട്രേഷന്‍ ഓസ്റ്റിനിലെ റോബോടാക്സി ലോഞ്ചിനെക്കുറിച്ചുള്ള ചോദ്യങ്ങളുടെ പട്ടിക മെയ് മാസത്തില്‍ ടെസ്ലയ്ക്ക് അയച്ചിരുന്നു. അതില്‍ എന്തെങ്കിലും തെറ്റ് സംഭവിച്ചാല്‍ കമ്പനി എങ്ങനെ ഇടപെടും, ക്രാഷ് റിപ്പോര്‍ട്ടിംഗ് എങ്ങനെ കൈകാര്യം ചെയ്യും, പ്രതികൂല കാലാവസ്ഥയെ എങ്ങനെ നേരിടും തുടങ്ങിയ ചോദ്യങ്ങള്‍ ഉള്‍പ്പെടുന്നുണ്ട്.
ഏജന്‍സിക്ക് ടെസ്ലയില്‍ നിന്ന് പ്രതികരണം ലഭിച്ചിട്ടുണ്ടെന്നും അത് അവലോകനം ചെയ്യുന്ന പ്രക്രിയയിലാണെന്നും നാഷണല്‍ ഹൈവേ ട്രാഫിക് സേഫ്റ്റി അഡ്മിനിസ്‌ട്രേഷന്‍ വക്താവ് പറഞ്ഞു.
കമ്പനി ഫുള്‍ സെല്‍ഫ്-ഡ്രൈവിംഗ് എന്ന് വിളിക്കുന്നതും അതിന്റെ റോബോടാക്‌സിസില്‍ ഉപയോഗിക്കുന്ന സാങ്കേതികവിദ്യയുമായി അടുത്ത ബന്ധമുള്ളതുമായ ഹാന്‍ഡ്സ്-ഫ്രീ വാഹനമോടിക്കാന്‍ വാഹന ഉടമകളെ അനുവദിക്കുന്ന സോഫ്റ്റ്വെയറിന്റെ സുരക്ഷയെക്കുറിച്ച് ടെസ്ല നിരവധി അന്വേഷണങ്ങള്‍ക്കും കേസുകള്‍ക്കും വിധേയമായിട്ടുണ്ട്.
വാഷിംഗ്ടണ്‍ പോസ്റ്റിന്റെ റിപ്പോര്‍ട്ട് പ്രകാരം ഈ സാങ്കേതികവിദ്യയുമായി ബന്ധപ്പെട്ട് കുറഞ്ഞത് 17 മരണങ്ങളും അഞ്ച് ഗുരുതരമായ പരിക്കുകളും ഉണ്ടായിട്ടുണ്ട്. സൂര്യപ്രകാശം, മൂടല്‍മഞ്ഞ്, പൊടി, ഇരുട്ട് തുടങ്ങിയ കാലാവസ്ഥകള്‍ ഫുള്‍ സെല്‍ഫ്-ഡ്രൈവിംഗ് സോഫ്റ്റ്വെയറിനെ തടസ്സപ്പെടുത്തിയതായി ഏജന്‍സി പറയുന്ന നിരവധി അപകടങ്ങള്‍ നാഷണല്‍ ഹൈവേ ട്രാഫിക് സേഫ്റ്റി അഡ്മിനിസ്‌ട്രേഷന്‍ പരിശോധിക്കുന്നുണ്ട്. അതില്‍ ഒരു കാല്‍നടയാത്രക്കാരന്റെ മരണത്തിന് കാരണമായ അപകടവും ഉള്‍പ്പെടുന്നു.
ഗൂഗിളിന്റെ മാതൃസ്ഥാപനമായ ആല്‍ഫബെറ്റിന്റെ ഉടമസ്ഥതയിലുള്ള വേമോയില്‍ നിന്നുള്ള സേവനങ്ങള്‍ ഇതിനകം തന്നെ ലഭ്യമായ ടെക്‌സസ് നഗരത്തിലെ തിരക്കേറിയ റോബോടാക്സി മാര്‍ക്കറ്റില്‍ ടെസ്ലയും ചേരും.
ആമസോണും ഫോക്സ്വാഗനും ഓസ്റ്റിനില്‍ ഡ്രൈവറില്ലാ ടാക്‌സികള്‍ പരീക്ഷിക്കുന്നുണ്ട്. നഗര തെരുവുകള്‍ മാപ്പ് ചെയ്യുന്നതിന് ലക്ഷക്കണക്കിന് മൈലുകള്‍ ഓടിച്ചും കാല്‍നടയാത്രക്കാര്‍, സൈക്ലിസ്റ്റുകള്‍, റോഡിലെ അപ്രതീക്ഷിത സംഭവങ്ങള്‍ എന്നിവ ഒഴിവാക്കാന്‍ അവരുടെ സോഫ്റ്റ്വെയര്‍ പരിശീലിപ്പിക്കാന്‍ പ്രവര്‍ത്തിച്ചും ഈ കമ്പനികള്‍ അവരുടെ സ്വയംഭരണ വാഹന സാങ്കേതികവിദ്യ വികസിപ്പിക്കുന്നതില്‍ സാവകാശത്തിലാണ് പ്രവര്‍ത്തിച്ചത്.