വാഷിംഗ്ടണ്‍: യു എസിന്റെ വിവിധ ഭാഗങ്ങളില്‍ നിന്ന് എട്ട് ഖാലിസ്ഥാന്‍ പ്രവര്‍ത്തകരെ ഫെഡറല്‍ ബ്യൂറോ ഓഫ് ഇന്‍വെസ്റ്റിഗേഷന്‍ (എഫ് ബി ഐ) അറസ്റ്റ് ചെയ്തു. തട്ടിക്കൊണ്ടുപോകല്‍ കേസിലാണ് നടപടി. ഇതില്‍ ദേശീയ അന്വേഷണ ഏജന്‍സി (എന്‍ ഐ എ) ഇന്ത്യയില്‍ തിരയുന്ന ഒരാള്‍ ഉള്‍പ്പെടെ പിടിയിലായിട്ടുണ്ട്.
അറസ്റ്റിലായ എട്ട് ഖാലിസ്ഥാനികളില്‍ പവിത്തര്‍ സിംഗ് ബടാലയും ഉള്‍പ്പെടുന്നു. പഞ്ചാബിലെ ഒരു ഗുണ്ടാസംഘാംഗമാണ് ഇയാള്‍. നിരോധിത ഭീകര സംഘടനയായ ബബ്ബര്‍ ഖല്‍സ ഇന്റര്‍നാഷണലിന്റെ (ബി കെ ഐ) നിര്‍ദ്ദേശപ്രകാരം ഭീകര പ്രവര്‍ത്തനങ്ങള്‍ നടത്തിയതിന് ഇയാള ഇന്ത്യ തിരയുകയായിരുന്നു.
2025 ജൂലൈ 11-ന് സ്റ്റോക്ക്ടണ്‍ പൊലീസ് ഡിപ്പാര്‍ട്ട്മെന്റ് സ്വാറ്റ് ടീം, മാന്റേക്ക പൊലീസ് ഡിപ്പാര്‍ട്ട്മെന്റ് സ്വാറ്റ് ടീം, സ്റ്റാനിസ്ലോസ് കൗണ്ടി ഷെരീഫ് ഓഫീസ് സ്വാറ്റ് ടീം, എഫ്ബിഐ സ്വാറ്റ് ടീം എന്നിവയ്ക്കൊപ്പം സാന്‍ ജോക്വിന്‍ കൗണ്ടിയില്‍ ഉടനീളം അഞ്ച് തിരച്ചില്‍ വാറണ്ടുകള്‍ നടപ്പിലാക്കിയെന്ന് സാന്‍ ജോക്വിന്‍ കൗണ്ടി ഷെരീഫ് ഓഫീസ് അറിയിച്ചു.
അന്വേഷണത്തിന്റെ ഫലമായി യു എസ് സ്വാറ്റ് സംഘങ്ങള്‍ ദില്‍പ്രീത് സിംഗ്, അര്‍ഷ്പ്രീത് സിംഗ്, അമൃത്പാല്‍ സിംഗ്, വിശാല്‍, പവിറ്റര്‍ സിംഗ്, ഗുര്‍താജ് സിംഗ്, മന്‍പ്രീത് രണ്‍ധാവ, സരബ്ജിത് സിംഗ് എന്നിവരെ അറസ്റ്റ് ചെയ്തതായി റിപ്പോര്‍ട്ടില്‍ പറയുന്നു.
അറസ്റ്റിലായവരില്‍ നിന്ന് പൂര്‍ണ ഓട്ടോമാറ്റിക് ഗ്ലോക്ക് ഉള്‍പ്പെടെ എഫ് ബി ഐ 5 ഹാന്‍ഡ്ഗണുകള്‍ പിടിച്ചെടുത്തു. ഒരു അസോള്‍ട്ട് റൈഫിള്‍, നൂറുകണക്കിന് റൗണ്ട് വെടിയുണ്ടകള്‍, ഉയര്‍ന്ന ശേഷിയുള്ള മാഗസിനുകള്‍, 15,000 യു എസ് ഡോളറിലധികം പണം എന്നിവയും പിടിച്ചെടുത്തിട്ടുണ്ട്.
എട്ട് ഖാലിസ്ഥാനി പ്രവര്‍ത്തകര്‍ക്കെതിരെ തട്ടിക്കൊണ്ടുപോകല്‍, പീഡനം, വ്യാജ തടവ്, കുറ്റകൃത്യം ചെയ്യാനുള്ള ഗൂഢാലോചന, സാക്ഷിയെ തടയല്‍/പിന്തുണയ്ക്കല്‍, സെമി ഓട്ടോമാറ്റിക് തോക്ക് ഉപയോഗിച്ചുള്ള ആക്രമണം, ഭീകരാക്രമണ ഭീഷണി, കുറ്റകൃത്യ സംഘത്തെ ശക്തിപ്പെടുത്തല്‍ എന്നിവയുള്‍പ്പെടെ നിരവധി കുറ്റങ്ങള്‍ ചുമത്തിയിട്ടുണ്ടെന്ന് ഷെരീഫിന്റെ ഓഫീസ് അറിയിച്ചു.
