ബോസ്റ്റണ്‍: ലോക്‌സഭ പ്രതിപക്ഷ നേതാവ് രാഹുല്‍ ഗാന്ധിയുടെ അമേരിക്കന്‍ സന്ദര്‍ശനം തുടങ്ങി. ബോസ്റ്റണ്‍ ലോഗന്‍ രാജ്യാന്തര വിമാനത്താവളത്തില്‍ വിമാനമിറങ്ങിയ രാഹുല്‍ ഗാന്ധിയെ ഇന്ത്യന്‍ ഓവര്‍സീസ് കോണ്‍ഗ്രസ് അധ്യക്ഷന്‍ സാം പിത്രോദ സ്വീകരിച്ചു.
രാഹുല്‍ ഗാന്ധിയുടേത് യുവാക്കളുടെയും ജനാധിപത്യത്തിന്റെയും ഭാവിയുടെയും ശബ്ദമെന്ന് സാം പിത്രോദ എക്‌സില്‍ കുറിച്ചു.
'അമേരിക്കയിലേക്ക് സ്വാഗതം! രാഹുല്‍ ഗാന്ധി, യുവാക്കള്‍ക്ക് വേണ്ടിയും ജനാധിപത്യത്തിന് വേണ്ടിയും മെച്ചപ്പെട്ട ഭാവിക്കു വേണ്ടിയുമുള്ള ശബ്ദം. നമുക്ക് കേള്‍ക്കാം, പഠിക്കാം, ഒരുമിച്ച് കെട്ടിപ്പടുക്കാം'സാം പിത്രോദ വ്യക്തമാക്കി.
ഏപ്രില്‍ 21, 22 തീയതികളിലാണ് രാഹുലിന്റെ അമേരിക്കയിലെ പരിപാടികള്‍ ക്രമീകരിച്ചിട്ടുള്ളത്. റോഡ് ഐലന്‍ഡിലെ ബ്രൗണ്‍ സര്‍വകലാശാല സന്ദര്‍ശിക്കുന്ന രാഹുല്‍, വിദ്യാര്‍ഥികളുമായും അധ്യാപകരുമായും സംവദിക്കും. കൂടാതെ, യു.എസിലെ പ്രവാസി ഇന്ത്യക്കാരുമായും ഇന്ത്യന്‍ ഓവര്‍സീസ് കോണ്‍ഗ്രസ് ഭാരവാഹികളുമായും കൂടിക്കാഴ്ച നടത്തും.
പ്രതിപക്ഷ നേതാവായ ശേഷം രാഹുല്‍ ഗാന്ധിയുടെ രണ്ടാമത്തെ അമേരിക്കന്‍ സന്ദര്‍ശനമാണ് ഇത്തവണത്തേത്. കഴിഞ്ഞ സെപ്തംബറില്‍ മൂന്നു ദിവസത്തെ സന്ദര്‍ശനത്തിന് രാഹുല്‍ അമേരിക്കയില്‍ എത്തിയിരുന്നു. അന്ന് ജോര്‍ജ് ടൗണ്‍ സര്‍വകലാശാലയിലെ വിദ്യാര്‍ഥികളുമായി അദ്ദേഹം സംവദിച്ചിരുന്നു.
രാഹുല്‍ ഗാന്ധി യുഎസില്‍; ബ്രൗണ്‍ സര്‍വകലാശാല സന്ദര്‍ശിക്കും, പ്രവാസി ഇന്ത്യക്കാരുമായി സംവദിക്കും
