വാര്‍സോ: പോളണ്ടില്‍ ഭരണഘടനാ കോടതിയെച്ചൊല്ലിയുള്ള രാഷ്ട്രീയ ഏറ്റുമുട്ടല്‍ രൂക്ഷമായതോടെ ആഫ്രിക്കന്‍ സന്ദര്‍ശനം പാതിവഴിയില്‍ റദ്ദാക്കി പ്രസിഡന്റ് കരോള്‍ നവ്‌റോക്കി വാര്‍സോയില്‍ തിരിച്ചെത്തി. ഭരണഘടനാ കോടതി അധ്യക്ഷന്‍ ബോഗ്ദാന്‍ സ്വിയെച്‌കോവ്‌സ്‌കിയെ സസ്‌പെന്‍ഡ് ചെയ്തതിനു പിന്നാലെ കോടതിക്കു മുന്നില്‍ കലാപവിരുദ്ധ പൊലീസ് സേനയെ വിന്യസിക്കുകയും പ്രതിപക്ഷമായ വലതുപക്ഷ നിയമനീതി പാര്‍ട്ടി (പിഐഎസ്) പ്രവര്‍ത്തകര്‍ പ്രതിഷേധവുമായി രംഗത്തെത്തുകയും ചെയ്തു.
കോടതി അധ്യക്ഷനെ നീക്കിയ നടപടിയെ കോടതി ഔദ്യോഗിക എക്‌സ് അക്കൗണ്ട് 'അട്ടിമറി'യെന്നാണ് വിശേഷിപ്പിച്ചത്. പ്രധാനമന്ത്രി ഡൊണാള്‍ഡ് ടസ്‌കിന്റെ സര്‍ക്കാരിനെതിരെ പ്രതിഷേധക്കാര്‍ മുദ്രാവാക്യം വിളിച്ചു. ചിലര്‍ ജപമാലകളും മതചിത്രങ്ങളുമായി പ്രാര്‍ഥന നടത്തിയുമാണ് പ്രതിഷേധത്തില്‍ പങ്കെടുത്തത്. കോടതി സമുച്ചയത്തിലേക്ക് കടക്കാന്‍ ശ്രമിച്ച മൂന്ന് പേരെ അറസ്റ്റ് ചെയ്തതായി പൊലീസ് അറിയിച്ചു.
2015 മുതല്‍ 2023 വരെ ഭരിച്ച പിഐഎസ് സര്‍ക്കാര്‍ നിയമിച്ച ജഡ്ജിമാരെ ഭരണഘടനാ കോടതിയില്‍നിന്ന് നീക്കാനുള്ള നീക്കത്തിലാണ് ടസ്‌ക് സര്‍ക്കാര്‍. യൂറോപ്യന്‍ യൂണിയന്‍ നിയമങ്ങളേക്കാള്‍ പോളിഷ് നിയമങ്ങള്‍ക്ക് മുന്‍ഗണന നല്‍കുന്ന നിലപാടാണ് മുന്‍ ഭരണകാലത്ത് കോടതി സ്വീകരിച്ചിരുന്നതെന്നും യൂറോപ്യന്‍ യൂണിയന്‍ ആരോപിച്ചിരുന്നു. 2023ലെ തെരഞ്ഞെടുപ്പില്‍ വിജയിച്ച ടസ്‌ക്, ബ്രസല്‍സുമായുള്ള നിയമതര്‍ക്കം പരിഹരിക്കുമെന്ന് പ്രഖ്യാപിച്ചിരുന്നെങ്കിലും കോടതിയിലെ നിയമനങ്ങള്‍ സംബന്ധിച്ച തര്‍ക്കം തുടരുകയാണ്.
കോടതി അധ്യക്ഷന്റെ സസ്‌പെന്‍ഷന്‍ പ്രഖ്യാപിച്ചത് ജഡ്ജി അന്ന കോര്‍വിന്‍പിയോത്രോവ്‌സ്‌കയാണ്. നിയമവാഴ്ച പുനഃസ്ഥാപിക്കാനാണ് നടപടിയെന്ന് അവര്‍ വിശദീകരിച്ചു. അതേസമയം, തനിക്ക് പകരം ഇടക്കാല അധ്യക്ഷയായി ചുമതലയേല്‍ക്കാന്‍ കോര്‍വിന്‍പിയോത്രോവ്‌സ്‌കയ്ക്ക് കഴിയില്ലെന്നും രാഷ്ട്രപതിയുടെ സത്യപ്രതിജ്ഞ നടന്നിട്ടില്ലെന്നും കോടതി ഔദ്യോഗിക അക്കൗണ്ട് വ്യക്തമാക്കി. സ്വിയെച്‌കോവ്‌സ്‌കി ഇപ്പോഴും അധ്യക്ഷസ്ഥാനത്ത് തുടരുകയാണെന്നും കോടതി അവകാശപ്പെട്ടു.
സ്വിയെച്‌കോവ്‌സ്‌കിയുടെയും ഡെപ്യൂട്ടി ബാര്‍ത്തലോമിയെജ് സൊഹാന്‍സ്‌കിയുടെയും നിയമപരിരക്ഷ നീക്കണമെന്ന് ആവശ്യപ്പെട്ടതായി നീതിന്യായ മന്ത്രി വാള്‍ഡെമാര്‍ സുറെക് അറിയിച്ചു. കോടതി സ്വകാര്യസ്വത്തുപോലെയായെന്നും അതിന്റെ പ്രവര്‍ത്തനം പുനഃസ്ഥാപിക്കേണ്ടതുണ്ടെന്നും അദ്ദേഹം പറഞ്ഞു. നിയമവാഴ്ച പുനഃസ്ഥാപിക്കല്‍ സര്‍ക്കാരിന്റെ കടമയാണെന്ന് പ്രധാനമന്ത്രി ടസ്‌കും പ്രതികരിച്ചു.
അതേസമയം, പ്രതിഷേധക്കാര്‍ക്കൊപ്പം നിലയുറപ്പിച്ച മുന്‍ പ്രധാനമന്ത്രി യാരോസ്ലാവ് കാചിന്‍സ്‌കി വിഷയത്തില്‍ ഇടപെടാന്‍ പ്രസിഡന്റ് നവ്‌റോക്കിയോട് ആവശ്യപ്പെട്ടു. സെനഗലിലേക്കുള്ള ഔദ്യോഗിക സന്ദര്‍ശനം വിമാനയാത്രയ്ക്കിടെ റദ്ദാക്കിയ പ്രസിഡന്റ് നേരിട്ട് ഭരണഘടനാ കോടതിയിലേക്ക് പോകുമെന്നാണ് മാധ്യമ റിപ്പോര്‍ട്ടുകള്‍. കോടതിയുടെ നേതൃത്വത്തെച്ചൊല്ലിയുള്ള അനിശ്ചിതത്വം പോളണ്ടിലെ രാഷ്ട്രീയ പ്രതിസന്ധി കൂടുതല്‍ രൂക്ഷമാക്കിയിരിക്കുകയാണ്.
പോളണ്ടില്‍ ഭരണഘടനാ കോടതിയെച്ചൊല്ലി രാഷ്ട്രീയ പ്രതിസന്ധി; ആഫ്രിക്കന്‍ സന്ദര്‍ശനം റദ്ദാക്കി പ്രസിഡന്റ് മടങ്ങി
