വാഷിംഗ്ടണ്‍: യുക്രെയ്‌നെതിരെയുള്ള റഷ്യയുടെ ആക്രമണം വര്‍ദ്ധിച്ചുവരുകയും വഌഡിമിര്‍ പുടിനോടുള്ള ക്ഷമ നഷ്ടപ്പെടുകയും ചെയ്യുന്ന സാഹചര്യത്തില്‍, വാഷിംഗ്ടണ്‍ യുക്രെയ്‌നിലേക്ക് പാട്രിയറ്റ് വ്യോമ പ്രതിരോധ സംവിധാനങ്ങള്‍ അയയ്ക്കുമെന്ന് യുഎസ് പ്രസിഡന്റ് ഡോണള്‍ഡ് ട്രംപ് ഞായറാഴ്ച പ്രഖ്യാപിച്ചു.
'അവര്‍ക്ക് അത്യാവശ്യമായി ആവശ്യമുള്ള പാട്രിയറ്റുകള്‍ അയയ്ക്കുമെന്ന് ജോയിന്റ് ബേസ് ആന്‍ഡ്രൂസില്‍ മാധ്യമപ്രവര്‍ത്തകരോട് സംസാരിക്കവെ ട്രംപ് പറഞ്ഞു. 'എത്ര എണ്ണം വേണമെന്ന കാര്യത്തില്‍ ഇതുവരെ തീര്‍പ്പാക്കിയിട്ടില്ലെന്നും അവര്‍ക്ക് സംരക്ഷണം ആവശ്യമുള്ളതിനാല്‍ അതിനാവശ്യമായവ നല്‍കുമെന്നും ട്രംപ് പറഞ്ഞു.
യുക്രെയ്‌നിലെ യുദ്ധം പുടിന്‍ കൈകാര്യം ചെയ്യുന്ന രീതിയിലും ട്രംപ് കൂടുതല്‍ അതൃപ്തി പ്രകടിപ്പിച്ചു. വെടിനിര്‍ത്തല്‍ ലക്ഷ്യമിട്ടുള്ള നടത്തിയ ചര്‍ച്ചകള്‍ക്കിടയിലും റഷ്യ മിസൈല്‍ ആക്രമണങ്ങള്‍ തുടരുന്നതിനിടെയാണ് യുക്രെയ്‌നിന് ആയുധം നല്‍കാനുള്ള യുഎസ് നീക്കം.
സമാധാനം ആഗ്രഹിക്കുന്നുവെന്ന് പറഞ്ഞതിനുശേഷം യുക്രെയ്‌നിനെതിരായ ആക്രമണം ശക്തമാക്കിയ റഷ്യന്‍ നേതാവിനെതിരെ അമേരിക്കന്‍ പ്രസിഡന്റ് രോഷം പ്രകടിപ്പിച്ചു. പുടിനോടുള്ള നിരാശ വര്‍ദ്ധിച്ചുവരുന്ന സാഹചര്യത്തില്‍, റഷ്യയ്‌ക്കെതിരെ പുതിയ ഉപരോധങ്ങള്‍ ഉടന്‍ പ്രഖ്യാപിക്കുമെന്ന് ട്രംപ് സൂചന നല്‍കി.
'പ്രസിഡന്റ് പുടിനെക്കുറിച്ച് എനിക്ക് വളരെ നിരാശയുണ്ട്, അദ്ദേഹം പറഞ്ഞ വാക്ക് പാലിക്കുന്ന ഒരാളാണെന്ന് ഞാന്‍ കരുതി. അദ്ദേഹം വളരെ മനോഹരമായി സംസാരിക്കും, പിന്നീട് രാത്രിയില്‍ ആളുകളെ ബോംബ് വയ്ക്കും. എനിക്ക് അത് ഇഷ്ടമല്ല.- ട്രംപ് പറഞ്ഞു.
റഷ്യയുടെ മിസൈല്‍, ഡ്രോണ്‍ ആക്രമണങ്ങളില്‍ നിന്ന് തന്റെ രാജ്യത്തെ സംരക്ഷിക്കുന്നതിനായി കൂടുതല്‍ നൂതനമായ വ്യോമ പ്രതിരോധ സംവിധാനങ്ങള്‍ വേണമെന്ന് യുക്രേനിയന്‍ പ്രസിഡന്റ് വോളോഡിമര്‍ സെലെന്‍സ്‌കി ആവര്‍ത്തിച്ച് ആവശ്യപ്പെട്ടിട്ടുണ്ട്. 'വളരെ സങ്കീര്‍ണ്ണമായ സൈനിക ഉപകരണങ്ങളുടെ വിവിധ ഭാഗങ്ങള്‍ കൈവിന് ലഭിക്കുമെന്ന് ട്രംപ് പറഞ്ഞു, 'അവര്‍ അതിന് 100% പണം നല്‍കുമെന്നും ടംപ് വ്യക്തമാക്കി.
ട്രംപ് യുക്രെയ്‌നിനായി 'ആക്രമണാത്മകമായ ഒരു പുതിയ സൈനിക സഹായ പാക്കേജ് പുറത്തിറക്കാന്‍ പോകുന്നുവെന്നാണ് ആക്‌സിയോസിന്റെ റിപ്പോര്‍ട്ട് പറയുന്നത്.
മോസ്‌കോ ഉള്‍പ്പെടെ റഷ്യന്‍ പ്രദേശത്തിനുള്ളിലെ ലക്ഷ്യങ്ങളെ ആക്രമിക്കാന്‍ കഴിവുള്ള ദീര്‍ഘദൂര ആക്രമണ ആയുധങ്ങള്‍ ഇതില്‍ ഉള്‍പ്പെടാന്‍ സാധ്യതയുണ്ട്. തിങ്കളാഴ്ച ട്രംപും നേറ്റോ സെക്രട്ടറി ജനറല്‍ മാര്‍ക്ക് റുട്ടെയും തമ്മിലുള്ള കൂടിക്കാഴ്ചയില്‍ ഈ പദ്ധതി ആവിഷ്‌കരിക്കുമെന്ന് റിപ്പോര്‍ട്ടുണ്ട്.
ട്രംപിന്റെ നയമാറ്റത്തിലെ ഒരു പ്രധാന ഘടകം ജൂലൈ 3 ന് പുടിനുമായി നടത്തിയ ഒരു ഫോണ്‍ സംഭാഷണമായിരുന്നു. ആ സംഭാഷണത്തിനിടെ റഷ്യന്‍ പ്രസിഡന്റ് സംഘര്‍ഷം രൂക്ഷമാക്കാന്‍ പദ്ധതിയിടുന്നതായി സൂചിപ്പിച്ചതായി റിപ്പോര്‍ട്ടില്‍ പറയുന്നു.
ഇതിനിടെ ഞായറാഴ്ച മോസ്‌കോയില്‍ സമ്മര്‍ദ്ദം ചെലുത്താന്‍ ട്രംപിന് വിപുലമായ അധികാരങ്ങള്‍ നല്‍കുന്നതിനായി രൂപകല്‍പ്പന ചെയ്ത ഒരു ദ്വികക്ഷി ഉപരോധ ബില്‍ യുഎസ് സെനറ്റര്‍മാര്‍ അവതരിപ്പിക്കുകയുണ്ടായി.
റഷ്യയുടെ യുദ്ധ ശ്രമങ്ങളെ സഹായിക്കുന്ന ഏതൊരു രാജ്യത്തിനും 500 ശതമാനം വരെ തീരുവ ചുമത്താന്‍ യുഎസ് പ്രസിഡന്റിന് അനുവദിക്കുന്നതാണ് നിര്‍ദ്ദിഷ്ട നിയമനിര്‍മ്മാണം. ചൈന, ഇന്ത്യ അല്ലെങ്കില്‍ ബ്രസീല്‍ എന്നീ രാജ്യങ്ങള്‍ ഇതിന് ഇരയായേക്കാം.
'ഈ യുദ്ധം അവസാനിപ്പിക്കാന്‍ പ്രസിഡന്റ് ട്രംപിന് ലഭ്യമായ ഒരു സ്ലെഡ്ജ്ഹാമര്‍ ആണിത്,' റിപ്പബ്ലിക്കന്‍ സെനറ്റര്‍ ലിന്‍ഡ്‌സെ ഗ്രഹാം സിബിഎസ് ന്യൂസിനോട് പറഞ്ഞു.
'പുടിന്റെ സമ്പദ്‌വ്യവസ്ഥയെയും പുടിന്റെ യുദ്ധ യന്ത്രത്തെ പിന്തുണയ്ക്കുന്ന എല്ലാ രാജ്യങ്ങളെയും പിന്തുടരാനുള്ള കഴിവ് ഈ ബില്‍ പ്രസിഡന്റ് ട്രംപിന് നല്‍കുമെന്ന് ഗ്രഹാം പറഞ്ഞു.
ജനുവരിയില്‍ വൈറ്റ് ഹൗസില്‍ തിരിച്ചെത്തിയ ട്രംപ്, മോസ്‌കോയുമായുള്ള സമാധാനത്തിന് മധ്യസ്ഥത വഹിക്കാമെന്ന പ്രതീക്ഷയില്‍ ഉപരോധങ്ങള്‍ കൂടുതല്‍ കര്‍ശനമാക്കുന്നതില്‍ നിന്ന് തുടക്കത്തില്‍ വിട്ടുനിന്നിരുന്നു. എന്നിരുന്നാലും, മാസങ്ങളായി സ്തംഭിച്ച ചര്‍ച്ചകളും തുടര്‍ച്ചയായ റഷ്യന്‍ ആക്രമണവും അദ്ദേഹത്തിന്റെ ക്ഷമയെ കെടുത്തിയതായി തോന്നുന്നു.
പകല്‍ മനോഹരമായി സംസാരിക്കും; രാത്രിയില്‍ മനുഷ്യരെ ബോംബ് വച്ച് കൊല്ലും; പുടിനെതിരെ രോഷം പ്രകടിപ്പിച്ച് ട്രംപ്; യുക്രെയ്‌നിലേക്ക് പാട്രിയറ്റ് വ്യോമ പ്രതിരോധ സംവിധാനങ്ങള്‍ അയയ്ക്കും
