ഹോർമുസ്: ഹോർമുസ് കടലിടുക്കിൽ എണ്ണ ടാങ്കറിനെ നേരെ വീണ്ടും ആക്രമണം. പനാമ പതാകയുള്ള ക്രൂഡ് ഓയിൽ ടാങ്കറിന് നേരെയാണ് ആക്രമണം ഉണ്ടായതെന്നും കപ്പലിൽ 27 ഇന്ത്യക്കാരുണ്ടായിരുന്നുവെന്നും അധികൃതർ വ്യക്തമാക്കി. എം.ടി. ലൂയിസ് 1 എന്ന കപ്പലിനു നേരെ ലിമ്പറ്റ് മൈൻ ഉപയോഗിച്ചാണ് ആക്രമണമുണ്ടായത്.
സ്ഫോടനത്തെത്തുടർന്ന് കപ്പലിന്റെ എൻജിൻ മുറിയിൽ തീപിടിത്തമുണ്ടാകുകയും കപ്പലിന്റെ പ്രവർത്തനം തടസപ്പെടുകയും ചെയ്തു. എന്നാൽ ജീവനക്കാർ തന്നെ തീ അണച്ചു. സംഭവത്തിൽ നാശനഷ്ടങ്ങൾ റിപ്പോർട്ട് ചെയ്തിട്ടില്ല. പിന്നീട് കപ്പൽ യാത്ര തുടരുകയും ചെയ്തു. ഇന്ത്യക്കാരായ എല്ലാ ജീവനക്കാരും പൂർണ്ണ സുരക്ഷിതരാണെന്ന് കേന്ദ്ര ഷിപ്പിംഗ് മന്ത്രി സർബാനന്ദ സോനോവാൾ സ്ഥിരീകരിച്ചു.
ഒമാന്റെ ഖസബിന് വടക്കുകിഴക്ക് 25 നോട്ടിക്കൽ മൈൽ മാറിയാണ് സംഭവം നടന്നത്. ഒരു ചെറിയ ബോട്ടിലെത്തിയ സംഘം കപ്പലിന്റെ ഹള്ളിൽ രണ്ട് ലിമ്പറ്റ് മൈനുകൾ ഒട്ടിച്ച് സ്ഫോടനം നടത്തുകയായിരുന്നു. യുഎസ്-ഇറാൻ സംഘർഷം ആരംഭിച്ചതിനുശേഷം ഹോർമുസ് കടലിടുക്കിൽ ലിമ്പറ്റ് മൈൻ വിജയകരമായി ഉപയോഗിക്കുന്നത് ഇതാദ്യമായാണ്.
ഫെബ്രുവരിയിൽ സംഘർഷം ആരംഭിച്ചതിനുശേഷം തന്ത്രപ്രധാനമായ ഹോർമുസ് കടലിടുക്കിൽ ലിംപെറ്റ് മൈനുകൾ ഉപയോഗിച്ചുള്ള ആദ്യ ആക്രമണമാണിത്. ഒമാനിലെ ഖസബിന് 46 കിലോമീറ്റർ വടക്കുകിഴക്കായാണ് സംഭവം നടന്നതെന്ന് ബ്രിട്ടീഷ് നാവികസേനയുടെ യുകെ മാരിടൈം ട്രേഡ് ഓപ്പറേഷൻസ് അറിയിച്ചു.
ഇതിന് തൊട്ടുതലേദിവസം (ഒക്ടോബർ 29) ലൈബീരിയൻ പതാകയുള്ള മറ്റൊരു ഭീമൻ എണ്ണക്കപ്പലായ 'എംടി അർസാനാ' എന്ന കപ്പലിന് നേരെയും ആക്രമണം ഉണ്ടായിരുന്നു. രണ്ട് ഇന്ത്യൻ ജീവനക്കാരുണ്ടായിരുന്ന ഈ കപ്പലും സുരക്ഷിതമാണെന്ന് അധികൃതർ അറിയിച്ചു.
ഇറാനും അമേരിക്കയും തമ്മിലുള്ള യുദ്ധസമാനമായ അന്തരീക്ഷത്തെ തുടർന്ന് ഒക്ടോബർ മാസത്തിൽ ഹോർമുസ് കടലിടുക്കിൽ കപ്പലുകൾക്ക് നേരെയുള്ള ആക്രമണങ്ങളിൽ വൻ വർദ്ധനവാണ് രേഖപ്പെടുത്തിയിരിക്കുന്നത്. അനുമതിയില്ലാത്ത പാതകളിലൂടെ സഞ്ചരിക്കുന്ന കപ്പലുകൾ തങ്ങളുടെ നാവിക മൈനുകളിൽ തട്ടി അപകടത്തിൽപ്പെടുന്നുണ്ടെന്നാണ് ഇറാൻ റെവല്യൂഷനറി ഗാർഡിന്റെ വാദം. അതേസമയം, ആഗോള എണ്ണ വിപണിയെയും കപ്പൽ ഗതാഗതത്തെയും ഈ സാഹചര്യം വൻതോതിൽ ബാധിച്ചിട്ടുണ്ട്
ഹോർമുസ് കടലിടുക്കിൽ ടാങ്കറിനു നേരെ ആക്രമണം; കപ്പലിൽ 27 ഇന്ത്യാക്കാർ
