ടൊറന്റോ: വേനല്‍ക്കാലത്തിന്റെ വരണ്ട കാലാവസ്ഥയില്‍ കിഴക്കന്‍ കാനഡയില്‍ വരള്‍ച്ചാ പ്രതിസന്ധി.
വേനല്‍ക്കാലം ആരംഭിച്ചതോടെ പതിവിലും ഗണ്യമായി കുറഞ്ഞ മഴയാണ് ലഭിക്കുന്നത്.
ടൊറന്റോ, ഹാലിഫാക്‌സ്, സെന്റ് ജോണ്‍സ് എന്നിവയുള്‍പ്പെടെയുള്ള നഗരങ്ങള്‍ ജൂണ്‍ ഒന്നു മുതല്‍ സാധാരണ മഴയുടെ 50 ശതമാനമോ അതില്‍ കുറവോ മാത്രമേ രേഖപ്പെടുത്തിയിട്ടുള്ളൂ, പല പ്രദേശങ്ങളിലും ഈ മാസം ആവശ്യത്തിനുള്ള മഴ ലഭിച്ചിട്ടില്ല. വരണ്ട കാലാവസ്ഥ ജലസംരക്ഷണ ശ്രമങ്ങള്‍ക്ക് പ്രേരിപ്പിക്കുകയും കൃഷിയെയും കാട്ടുതീ സാധ്യതയെയും കുറിച്ചുള്ള ആശങ്കകള്‍ ഉയര്‍ത്തുകയും ചെയ്യുന്നു.
നോവ സ്‌കോഷ്യയില്‍ ജലസംഭരണികളില്‍ വെള്ളം കുറയുന്നതിനാല്‍ സ്വമേധയാ ജല സംരക്ഷണത്തിന് ഹാലിഫാക്‌സ് വാട്ടര്‍ നിവാസികളോട് അഭ്യര്‍ഥിച്ചു. വരണ്ട കാലാവസ്ഥ ദീര്‍ഘകാലത്തേക്കായതിനാല്‍ വരും ദിവസങ്ങളില്‍ ജലവിതരണം വഷളാകുമെന്ന് പ്രതീക്ഷിക്കുന്നതായി യൂട്ടിലിറ്റി പറഞ്ഞു.
ശാസ്ത്രജ്ഞര്‍ക്ക് നിലവിലെ വരള്‍ച്ചയെ കാലാവസ്ഥാ വ്യതിയാനവുമായി നേരിട്ട് ബന്ധിപ്പിക്കാന്‍ ഇതുവരെ കഴിയുന്നില്ലെങ്കിലും ആഗോള താപനില ഉയരുന്നത് വരള്‍ച്ചയും വെള്ളപ്പൊക്കവും ഉള്‍പ്പെടെയുള്ള തീവ്ര കാലാവസ്ഥയ്ക്ക് കാരണമാകുമെന്ന് കാലാവസ്ഥാ നിരീക്ഷകന്‍ റോസ് ഹള്‍ വിശദീകരിച്ചു.
കഴിഞ്ഞ രണ്ട് വര്‍ഷങ്ങളായി തങ്ങള്‍ ഈ രണ്ട് കാലാവസ്ഥകളും അനുഭവിച്ചിട്ടുണ്ടെന്ന് ഹാള്‍ പറഞ്ഞു.
ജൂണ്‍ അവസാനത്തോടെ രാജ്യത്തിന്റെ 62 ശതമാനം പ്രദേശങ്ങളിലും 'അസാധാരണമായി വരണ്ട' അവസ്ഥ ഉള്‍പ്പെടെ 'മിതമായത് മുതല്‍ അതിതീവ്ര വരള്‍ച്ച' വരെയുള്ള അവസ്ഥകള്‍ അനുഭവപ്പെട്ടതായി എന്‍വയോണ്‍മെന്റ് കാനഡയുടെ ജൂണിലെ വരള്‍ച്ച റിപ്പോര്‍ട്ട് കാണിക്കുന്നു, ഇത് കാനഡയുടെ കാര്‍ഷിക ഭൂമിയുടെ 66 ശതമാനത്തെയും ബാധിച്ചു.
സതേണ്‍ ന്യൂ ബ്രണ്‍സ്വിക്കിലും നോവ സ്‌കോഷ്യയുടെ ഭൂരിഭാഗത്തും ജൂണില്‍ സാധാരണ മഴയുടെ 85 ശതമാനത്തില്‍ താഴെ മാത്രമേ ലഭിച്ചുള്ളൂ. തെക്കന്‍ ഒന്റാറിയോയുടെയും തെക്കുപടിഞ്ഞാറന്‍ ക്യൂബെക്കിന്റെയും ചില ഭാഗങ്ങളില്‍ ശരാശരിയേക്കാള്‍ കൂടുതല്‍ മഴ പെയ്‌തെങ്കിലും പ്രാദേശിക വരള്‍ച്ച നിലനിന്നു.
ജൂണ്‍ അവസാനത്തിലെ ഉയര്‍ന്ന താപനില തെക്കന്‍, കിഴക്കന്‍ ഒന്റാറിയോയുടെ ചില ഭാഗങ്ങളില്‍ വരള്‍ച്ചയുടെ നില ത്വരിതപ്പെടുത്തി. ഇത് ജലവിതരണത്തിലും വിളകളിലും പ്രതിസന്ധിയുണ്ടാക്കി.
ബാധിത പ്രദേശങ്ങളിലെ കര്‍ഷകര്‍ അവരുടെ വിളകളെ സംരക്ഷിക്കുന്നതിന് ചെലവേറിയ ജലസേചന ആവശ്യങ്ങളാണ് നേരിടുന്നത്. അതേസമയം വരണ്ട കാലാവസ്ഥയില്‍ കാട്ടുതീ സാധ്യത കുറയ്ക്കുന്നതിന് നിരവധി പ്രവിശ്യകളിലുടനീളമുള്ള ഉദ്യോഗസ്ഥര്‍ പ്രവര്‍ത്തിക്കുന്നുണ്ട്.