കണ്ണൂര്: മുന് ജില്ലാ പഞ്ചായത്ത് പ്രസിഡന്റ് പി പി ദിവ്യയെ അറസ്റ്റ് ചെയ്യാത്ത പൊലീസ് നടപടിയില് പ്രതിഷേധിച്ച് ലുക്കൗട്ട് നോട്ടീസുമായി യൂത്ത് കോണ്ഗ്രസ്. പി പി ദിവ്യക്കെതിരെ ലുക്കൗട്ട് നോട്ടീസ് പോസ്റ്റര് ഇറക്കിയാണ് യൂത്ത് കോണ്ഗ്രസ് കണ്ണൂരില് പ്രതിഷേധിച്ചത്.
പി പി ദിവ്യ വാണ്ടഡ് എന്നെഴുതിയ പോസ്റ്ററുമായി കണ്ണൂര് പൊലീസ് സ്റ്റേഷനിലേക്ക് യൂത്ത് കോണ്ഗ്രസ് മാര്ച്ച് നടത്തി. തുടര്ന്ന് കണ്ണൂര് ടൗണ് പൊലീസ് സ്റ്റേഷന് മുന്നില് പോസ്റ്റര് സ്ഥാപിച്ചു. സ്റ്റേഷന് മതിലിലും പോസ്റ്റര് പതിച്ചു.
പൊലീസ് സ്റ്റേഷന് മുന്നില് പോസ്റ്റര് പതിക്കാന് ശ്രമിച്ച യൂത്ത് കോണ്ഗ്രസ് പ്രവര്ത്തകനെ പൊലീസ് കസ്റ്റഡിയിലെടുത്തു. കസ്റ്റഡിയിലെടുത്തയാളെ വിട്ടുകിട്ടുന്നതിനായി യൂത്ത് കോണ്ഗ്രസ് പ്രവര്ത്തകര് സ്റ്റേഷന് മുന്നില് പ്രതിഷേധിച്ചു. പ്രവര്ത്തകനെ വിട്ടതോടെയാണ് പ്രതിഷേധം അവസാനിപ്പിച്ചത്. ജില്ലാ പഞ്ചായത്ത് കവാടത്തിലും ലുക്ക്ഔട്ട് നോട്ടീസ് പതിച്ചു. തുടര്ന്ന് പഞ്ചായത്ത് ഓഫീസിനുള്ളില് മുദ്രാവാക്യം വിളിച്ച് പ്രതിഷേധിച്ചു.