വാഷിംഗ്ടണ്: ഇന്ത്യ- അമേരിക്ക വ്യാപാര കരാര് ചര്ച്ചകള് നിരവധി വിവാദ വിഷയങ്ങളില് കുടുങ്ങിക്കിടക്കുന്നതിനിടെ, പയര് വര്ഗങ്ങള് ഇരുരാജ്യങ്ങള്ക്കിടയിലെ മറ്റൊരു സംഘര്ഷ ബിന്ദുവായി മാറാന് സാധ്യത. യു എസ് ഡയറി, കാര്ഷിക ഉത്പന്നങ്ങള്ക്ക് കൂടുതല് വിപണി പ്രവേശനം നല്കുന്നതുള്പ്പെടെയുള്ള വിഷയങ്ങളില് അഭിപ്രായവ്യത്യാസങ്ങള് തുടരുന്നതിനിടെയാണ് അമേരിക്കന് സെനറ്റിലെ രണ്ട് അംഗങ്ങള് ഇന്ത്യ പയര്വര്ഗങ്ങള്ക്ക് ഏര്പ്പെടുത്തിയ 30 ശതമാനം ഇറക്കുമതി തീരുവ പിന്വലിക്കാന് ന്യൂഡല്ഹിയോട് സമ്മര്ദ്ദം ചെലുത്തണമെന്ന് ആവശ്യപ്പെട്ട് പ്രസിഡന്റ് ഡൊണള്ഡ് ട്രംപിന് കത്തയച്ചത്.
ജനുവരി 16-ന് അയച്ച കത്തില്, നോര്ത്ത് ഡക്കോട്ടയില് നിന്നുള്ള സെനറ്റര് കെവിന് ക്രാമറും മോണ്ടാനയില് നിന്നുള്ള സെനറ്റര് സ്റ്റീവ് ഡെയ്ന്സും വാഷിംഗ്ടണും ന്യൂഡല്ഹിയും തമ്മിലുള്ള ഭാവിയിലെ കരാറുകളില് 'പയര് വര്ഗ കൃഷിക്ക് അനുകൂല വ്യവസ്ഥ' ഉള്പ്പെടുത്തണമെന്ന് ട്രംപിനോട് ആവശ്യപ്പെട്ടു. ഉയര്ന്ന നിലവാരമുള്ള അമേരിക്കന് പയര്വര്ഗ ഉത്പന്നങ്ങള് ഇന്ത്യയിലേക്ക് കയറ്റുമതി ചെയ്യുമ്പോള്, നിലവിലെ ഇന്ത്യന് തീരുവകള് മൂലം യു എസ് കര്ഷകര്ക്ക് കടുത്ത മത്സരനഷ്ടം നേരിടുന്നുണ്ടെന്നതാണ് കത്തിലെ മുഖ്യ വാദം.
മാധ്യമങ്ങളില് അധികം ശ്രദ്ധിക്കപ്പെടാതിരുന്ന ഒരു വസ്തുതയും കത്ത് ചൂണ്ടിക്കാട്ടുന്നുട്രംപ് ഭരണകൂടം ഏര്പ്പെടുത്തിയ കടുത്ത തീരുവകള്ക്ക് മറുപടിയായി ഇന്ത്യ ഓഗസ്റ്റ് അവസാനം തീരുവകള് വര്ധിപ്പിച്ചതിന് പിന്നാലെ അമേരിക്കന് കാര്ഷിക ഉത്പന്നങ്ങള്ക്ക് മേല് അധിക തീരുവകള് ഇന്ത്യ പ്രഖ്യാപിച്ചിരുന്നു.
2025 ഒക്ടോബര് 30-ന് മഞ്ഞ പയറിന് (യെല്ലോ പീസ്) 30 ശതമാനം ഇറക്കുമതി തീരുവ ഏര്പ്പെടുത്തുമെന്ന് ഇന്ത്യ പ്രഖ്യാപിച്ചു. നവംബര് 1 മുതല് ഈ ഉയര്ന്ന തീരുവ പ്രാബല്യത്തില് വന്നു. അന്യായമായ ഇന്ത്യന് തീരുവകള് മൂലം, ഉയര്ന്ന നിലവാരമുള്ള പയര് വര്ഗങ്ങള് ഇന്ത്യയിലേക്ക് കയറ്റുമതി ചെയ്യുന്നതില് അമേരിക്കന് കര്ഷകര്ക്ക് ഗണ്യമായ മത്സരനഷ്ടം നേരിടേണ്ടിവരും എന്നാണ് സെനറ്റര്മാര് കത്തില് വ്യക്തമാക്കുന്നത്.
ട്രംപിന്റെ ആദ്യ ഭരണകാലത്ത് തന്നെ ഇതേ വിഷയത്തില് തങ്ങള് കത്തയച്ചിരുന്നുവെന്നും 2020-ലെ വ്യാപാര ചര്ച്ചകള്ക്കിടെ ആ കത്ത് ട്രംപ് നേരിട്ട് പ്രധാനമന്ത്രി നരേന്ദ്ര മോഡിക്ക് കൈമാറിയിരുന്നുവെന്നും സെനറ്റര്മാര് ഓര്മ്മിപ്പിച്ചു. അതുവഴി 'അമേരിക്കന് ഉത്പാദകരെ ചര്ച്ചാ മേശയിലേക്ക് കൊണ്ടുവരാന്' സാധിച്ചുവെന്നും അവര് അവകാശപ്പെട്ടു.
ലോകത്ത് ഏറ്റവും കൂടുതല് പയര് വര്ഗങ്ങള് ഉപയോഗിക്കുന്ന രാജ്യമാണ് ഇന്ത്യ. ആഗോള ഉപഭോഗത്തിന്റെ ഏകദേശം 27 ശതമാനമാണ് ഇന്ത്യയുടേത്. ഈ വിപണി അമേരിക്കന് കര്ഷകര്ക്ക് വലിയ അവസരമാണെന്നും ഈ ഉത്പന്നങ്ങളുടെ കയറ്റുമതി വര്ധിപ്പിക്കുന്നത് യു എസുമായുള്ള വ്യാപാര അസമത്വം കുറയ്ക്കാന് സഹായിക്കുമെന്നും നിയമനിര്മ്മാതാക്കള് ചൂണ്ടിക്കാട്ടി.
ട്രംപ് ഭരണകൂടം ഏര്പ്പെടുത്തിയ ഉയര്ന്ന തീരുവകളില് ഏറ്റവും കൂടുതല് ബാധിക്കപ്പെട്ട രാജ്യങ്ങളിലൊന്നായിരുന്നു ഇന്ത്യ. തുടക്കത്തില് 25 ശതമാനം തീരുവ ചുമത്തിയ യു എസ് 2025 ഓഗസ്റ്റില് അത് 50 ശതമാനമായി ഉയര്ത്തി. റഷ്യന് എണ്ണ ഇറക്കുമതി തുടരുന്നതുമായി ബന്ധപ്പെട്ട ശിക്ഷാരൂപമായ അധിക ചാര്ജാണ് ഈ വര്ധനവിന് പിന്നില്. വസ്ത്രങ്ങള്, രത്ന ആഭരണങ്ങള്, ചെരുപ്പ്, ഫര്ണിച്ചര്, രാസവസ്തുക്കള് തുടങ്ങിയ പ്രധാന കയറ്റുമതികളിലാണ് 50 ശതമാനം തീരുവ ബാധകമായത്. എന്നാല് ഫാര്മസ്യൂട്ടിക്കല്സ്, സെമികണ്ടക്ടറുകള്, ചായ, കാപ്പി, മസാലകള് തുടങ്ങിയ മേഖലകള്ക്ക് ഇളവുകള് ലഭിച്ചിട്ടുണ്ട്.
ഇന്ത്യ- യു എസ് വ്യാപാര ചര്ച്ചകള് നിര്ണായക ഘട്ടത്തിലെത്തിയിരിക്കെ പയര് വര്ഗങ്ങളെ ചുറ്റിപ്പറ്റിയുള്ള പുതിയ സമ്മര്ദ്ദം കരാര് ചര്ച്ചകളെ കൂടുതല് സങ്കീര്ണ്ണമാക്കുമോയെന്ന ആശങ്കകളാണ് ഇപ്പോള് ഉയരുന്നത്.