ധാക്ക: ധാക്ക അന്താരാഷ്ട്ര വിമാനത്താവളത്തിലെ കാര്‍ഗോ കോംപ്ലക്‌സില്‍ വന്‍ തീപിടിത്തം. വിമാനത്താവളത്തില്‍ നിന്നുള്ള എല്ലാ സര്‍വീസുകളും താത്കാലികമായി നിര്‍ത്തി. തീ പിടിത്തത്തില്‍ ആര്‍ക്കും പരുക്കേറ്റിട്ടില്ല. അഗ്നിശമനാ സേന തീ നിയന്ത്രണ വിധേയമാക്കി.
36 അഗ്നിശമന സേനാ യൂണിറ്റുകളാണ് ദൗത്യത്തില്‍ പങ്കാളികളായത്. എയര്‍ഫോഴ്‌സിന്റെ ഫയര്‍ യൂണിറ്റുകളും തീ കെടുത്താന്‍ രംഗത്തെത്തി. കനത്ത പുക കൊണ്ട് നിറഞ്ഞ അവസ്ഥയിലായിരുന്നു വിമാനത്താവളത്തിന്റെ ഭൂരിഭാഗം പ്രദേശവും. അഞ്ച് ദിവസത്തിനിടെ മൂന്നാമത്തെ വലിയ തീപിടിത്തമാണ് ബംഗ്ലാദേശില്‍ റിപ്പോര്‍ട്ട് ചെയ്തിരിക്കുന്നത്.
വ്യാഴാഴ്ചയുണ്ടായ തീപിടിത്തത്തില്‍ ചിറ്റഗോങ് എക്‌സ്‌പോര്‍ട് പ്രോസസിങ് സോണിലെ എട്ടുനില കെട്ടിടം അപ്പാടെ കത്തിപ്പോയിരുന്നു. ചൊവ്വാഴ്ച ധാക്കയിലെ കെമിക്കല്‍ വെയര്‍ഹൗസിലുണ്ടായ തീ പിടിത്തത്തില്‍ 16 തൊഴിലാളികളാണ് കൊല്ലപ്പെട്ടത്.