ഗാസ: ഗാസയിലേക്കുളള സഹായം ഹമാസ് കൊള്ളയടിക്കുന്നതായി ഇസ്രായേല്‍ ആരോപിച്ചു. ഇസ്രായേല്‍ സര്‍ക്കാര്‍ വക്താവ് ഡേവിഡ് മെന്‍സറാണ് ഗാസയിലേക്കുള്ള സഹായം കൊള്ളയടിച്ചതായി ആരോപിച്ചത്.
യു എസും ഇസ്രായേലും നടത്തിയ ആക്രമണങ്ങളെത്തുടര്‍ന്ന് ഇറാന്റെ ആണവ പദ്ധതിക്ക് നിരവധി വര്‍ഷങ്ങളോളം നീണ്ടുനില്‍ക്കുന്ന തിരിച്ചടിയാണ് ഉണ്ടായതെന്നും അദ്ദേഹം പറഞ്ഞു.
ഹമാസിന്റെ കൊള്ളയടി തടയാന്‍ ടെല്‍ അവീവ് ഗാസയിലേക്കുള്ള സഹായ വിതരണം രണ്ട് ദിവസത്തേക്ക് നിര്‍ത്തിവച്ചിരിക്കുകയാണെന്ന് ഒരു ഉദ്യോഗസ്ഥന്‍ പറഞ്ഞു. സഹായ ട്രക്കുകളില്‍ മുഖംമൂടി ധരിച്ച പുരുഷന്മാരെ കാണിക്കുന്ന ചിത്രങ്ങള്‍ പ്രചരിച്ചതിനെ തുടര്‍ന്നാണ് നടപടി.
പ്രതിരോധ മന്ത്രി ഇസ്രായേല്‍ കാറ്റ്സുമായി നടത്തിയ സംയുക്ത പ്രസ്താവനയില്‍ ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു പറഞ്ഞത് സഹായം ഹമാസ് നിയന്ത്രണത്തിലാക്കുന്നത് തടയാന്‍ രണ്ട് ദിവസത്തിനുള്ളില്‍ ഒരു വഴി അവതരിപ്പിക്കാന്‍ സൈന്യത്തോട് ഉത്തരവിട്ടുവെന്നാണ്.
വടക്കന്‍ ഗാസയിലെ സാധാരണക്കാര്‍ക്കായി ഉദ്ദേശിച്ച സഹായം ഹമാസ് പിടിച്ചെടുക്കുന്നതായി പുതിയ വിവരങ്ങള്‍ സൂചിപ്പിച്ചതിനെ തുടര്‍ന്നാണ് നടപടി. പ്രസ്താവനയില്‍ വിവരങ്ങള്‍ വെളിപ്പെടുത്തിയിട്ടില്ലെങ്കിലും ഡസന്‍ കണക്കിന് മുഖംമൂടി ധരിച്ച ആളുകള്‍ സഹായവുമായി പോകുന്ന ട്രക്കുകള്‍ ആക്രമിക്കുന്നത് കാണിക്കുന്ന വീഡിയോ പ്രചരിക്കുന്നുണ്ട്. ഇതില്‍ ചിലര്‍ ആയുധധാരികളാണ്.
മേഖലയില്‍ സ്വാധീനമുള്ള വംശങ്ങളെ പ്രതിനിധീകരിക്കുന്ന ഹയര്‍ കമ്മീഷന്‍ ഫോര്‍ ട്രൈബല്‍ അഫയേഴ്സ് 'ഗോത്ര ശ്രമങ്ങളിലൂടെ മാത്രം' കൈകാര്യം ചെയ്യുന്ന ഒരു സഹായ സുരക്ഷാ പ്രക്രിയയുടെ ഭാഗമായി ട്രക്കുകള്‍ സംരക്ഷിക്കപ്പെട്ടിട്ടുണ്ടെന്ന് പറഞ്ഞു. ഹമാസ് ഈ പ്രക്രിയയില്‍ പങ്കെടുത്തിട്ടില്ലെന്ന് സൂചിപ്പിച്ചു.
ഇസ്രായേലും ഹമാസും തമ്മില്‍ ഗാസയില്‍ വെടിനിര്‍ത്തലിനുള്ള ചര്‍ച്ചകള്‍ മധ്യസ്ഥ രാജ്യങ്ങളുമായി ചേര്‍ന്ന് ശക്തമായതായി നേരത്തെ ഹമാസിന്റെ ഒരു മുതിര്‍ന്ന വ്യക്തി വാര്‍ത്താ ഏജന്‍സിയായ എ എഫ് പിയോട് പറഞ്ഞിരുന്നു.
12 ദിവസത്തെ സംഘര്‍ഷത്തിന് ശേഷം ഇസ്രായേലും ഇറാനും തമ്മില്‍ വെടിനിര്‍ത്തല്‍ പ്രഖ്യാപിച്ചതിന് ശേഷം ടെല്‍ അവീവിന്റെ ശ്രദ്ധ ഇപ്പോള്‍ ഗാസയിലേക്കും ഹമാസിനെതിരെയുള്ള പോരാട്ടത്തിലേക്കും തിരിയുമെന്ന് ഇസ്രായേലി സൈനിക മേധാവി പറഞ്ഞു.
ബന്ദികളെ തിരികെ കൊണ്ടുവരികയും ഹമാസ് ഭരണകൂടത്തെ തകര്‍ക്കുകയും ചെയ്യുക എന്നതിലാണ് ശ്രദ്ധയെന്ന് ചീഫ് ഓഫ് സ്റ്റാഫ് ലെഫ്റ്റനന്റ് ജനറല്‍ ഇയാല്‍ സമീര്‍ ഒരു പ്രസ്താവനയില്‍ പറഞ്ഞു.