തിരുവനന്തപുരം: മലയാളം കലിഗ്രാഫി രംഗത്ത് പ്രമുഖനായ നാരായണ ഭട്ടതിരിയെ വേള്‍ഡ് കലിഗ്രഫി അസോസിയേഷന്റെ ഓണററി ഡയറക്ടറായി നിയമിച്ചു. കൊറിയയിലെ ചിയോങ്ജുവില്‍ നടന്ന ജിക്ജി അന്താരാഷ്ട്ര കലിഗ്രഫി പ്രദര്‍ശനത്തിന്റെ ഉദ്ഘാടനച്ചടങ്ങിലാണ് ഈ പ്രഖ്യാപനം നടത്തിയത്. ഇന്ത്യയില്‍ നിന്ന് ഈ സ്ഥാനത്തേക്ക് നിയമിക്കപ്പെടുന്ന ആദ്യ വ്യക്തിയാണ് ഭട്ടതിരി.
ഈ വര്‍ഷത്തെ ജിക്ജി അന്താരാഷ്ട്ര കലിഗ്രഫി പ്രദര്‍ശനത്തില്‍ ജൂറി അംഗമായും ഭട്ടതിരി പ്രവര്‍ത്തിച്ചിരുന്നു. കലിഗ്രഫി രംഗത്തെ കൈമാറ്റങ്ങളും സഹകരണവും ശക്തിപ്പെടുത്തുന്നതിനായി കൊറിയയിലെ വേള്‍ഡ് സ്‌ക്രിപ്റ്റ് കലിഗ്രഫി അസോസിയേഷന്‍ അധ്യക്ഷന്‍ കിം ഡോങ്-യേന്‍യും ഇന്ത്യയിലെ കചടതപ ഫൗണ്ടേഷന്‍ ചെയര്‍മാന്‍ നാരായണ ഭട്ടതിരിയും ധാരണാപത്രത്തില്‍ ഒപ്പുവച്ചു.
ധാരണാപത്രത്തിന്റെ അടിസ്ഥാനത്തില്‍, കലിഗ്രഫിയുമായി ബന്ധപ്പെട്ട പ്രദര്‍ശനങ്ങള്‍, വര്‍ക്ക്ഷോപ്പുകള്‍ തുടങ്ങിയ പരിപാടികള്‍ സംയുക്തമായി സംഘടിപ്പിക്കുന്നതും കലിഗ്രഫി കലാകാരന്മാര്‍ക്കും ഗവേഷകര്‍ക്കും വേണ്ടി വിദ്യാഭ്യാസ- കൈമാറ്റ പരിപാടികള്‍ നടപ്പിലാക്കുന്നതുമാണ് ലക്ഷ്യമിടുന്നത്.
ഈ നിയമനം, ഇന്ത്യയിലെ കലിഗ്രഫി കലാരംഗത്തിനും ആഗോള തലത്തിലുള്ള മലയാള പ്രതിനിധിത്തത്തിനും ഗൗരവമേറിയ അംഗീകാരമായി വിലയിരുത്തപ്പെടുന്നു.